मिति २०८२ पौष १ गतेका दिन थाइल्यान्डमा सम्पन्न UG–5 सम्बन्धी एक महिने तालिमको समापन कार्यक्रम सफलतापूर्वक सम्पन्न भएको छ। नेपालको तर्फबाट धमकाय फाउन्डेसनद्वारा आयोजित उक्त तालिममा नेपालका विभिन्न जिल्लाबाट सहभागी नेपाली शिक्षकहरूको उल्लेखनीय उपस्थिति रहेको थियो।

समापन कार्यक्रममा मरिण गाउँपालिकाका अध्यक्ष श्री विमर्श मुक्तान (प्रख्यात) ज्यू प्रमुख वक्ताका रूपमा सहभागी भई नेपाली शिक्षकहरूलाई लक्षित गर्दै आफ्नो अमूल्य मन्तव्य व्यक्त गर्नुभयो। उहाँले तालिमले शिक्षकहरूको पेशागत क्षमता, नैतिक शिक्षा तथा आधुनिक शिक्षण पद्धतिमा दक्षता अभिवृद्धि गर्न महत्वपूर्ण योगदान पुर्‍याउने विश्वास व्यक्त गर्नुभयो।

अध्यक्ष श्री मुक्तान ज्यूले शिक्षकहरू राष्ट्र निर्माणका मुख्य आधार भएको उल्लेख गर्दै, यस्ता अन्तर्राष्ट्रिय तालिमहरूले शिक्षाको गुणस्तर उकास्न मद्दत पुग्ने बताउनुभयो। साथै, उहाँले तालिमबाट प्राप्त ज्ञान, सीप र अनुभवलाई स्वदेश फर्किएपछि कक्षाकोठामा व्यवहारिक रूपमा लागू गर्न सहभागी शिक्षकहरूलाई आग्रह गर्नुभयो।

कार्यक्रममा सहभागी शिक्षकहरूले तालिम अत्यन्त उपयोगी, प्रेरणादायी तथा व्यवहारिक रहेको प्रतिक्रिया व्यक्त गरेका थिए। आयोजक संस्था धमकाय फाउन्डेसनले आगामी दिनमा पनि नेपाली शिक्षकहरूको क्षमता विकासका लागि यस्ता अन्तर्राष्ट्रिय तालिम तथा कार्यक्रमलाई निरन्तरता दिने जानकारी गराएको छ।